အင္တာနက္မွာ ေလ့လာပါ

နည်းပညာရဲ့ တိုးတက်ပြောင်းလဲမှုတွေကြောင့် ဒီနေ့ခေတ်အချိန်မှာ ကမ္ဘာကြီးကို ရွာကြီးတစ်ရွာလို့ တင်စား ရလောက်အောင် တစ်နေရာနဲ့ တစ်နေရာကို အင်တာနက်က တဆင့် ထိတွေ့ ဆက်သွယ်နိုင်ကြ ပါတယ်။ တစ်ချိန်တုန်းကတော့ အင်တာနက်သုံးဖို့ အင်တာနက်ဆိုင်ကို တကူးတက သွားကြရပေမယ့် ခုအချိန် မှာတော့ ဖုန်းလိုင်းမိတဲ့ နေရာတိုင်းက အင်တာနက်သုံးလို့ ရနေပြီ ဖြစ်တဲ့အတွက် မြန်မာပြည်ရဲ့ အင်တာနက် သုံးစွဲမှုရာခိုင်နှုန်းဟာလည်း တိုးတက်လာပါတယ် (ကွန်နက်ရှင် မကောင်းတာကလွဲရင်ပေါ့)။ အင်တာနက်ကို လူကြီး၊ လူငယ် အရွယ်သုံးပါး မရွေး အသုံးပြုနေကြပါတယ်။

နေ့စဉ်နဲ့ အမျှ အင်တာနက်ကို သုံးဖြစ်နေကြတယ်ဆိုရင် ကိုယ့်ရဲ့ အင်တာနက် သုံးရတဲ့ ရည်ရွယ်ချက်က ဘာလဲ ? social networking တစ်ခုထဲမှာပဲ အချိန်ကုန်နေမှာလား ? ဒါကို အင်တာနက်သုံးစွဲနေကြတဲ့ လူငယ်တွေ အနေနဲ့ နည်းနည်းတော့ စဉ်းစားကြည့်ဖို့ လိုပါလိမ့်မယ်။ အပျော်သဘော သုံးရုံသက်သက် မဟုတ်ဘဲ ကိုယ့်ဘဝအတွက် အထောက်အကူပေးနိုင်အောင် သုံးစွဲကြဖို့လည်း တိုက်တွန်းချင်ပါတယ်။

အင်တာနက်ကို တကယ်အသုံးချနိုင်မယ်ဆိုရင် ကိုယ့်ဘဝအတွက် ဗဟုသုတဘဏ်တိုက်၊ ပညာရပ်ဘဏ်  တိုက်ကြီး တစ်ခုပါ။ ၁၉၉၆ ခုနှစ်မှာ Stanford တက္ကသိုလ်ရဲ့ Ph.D ကျောင်းသား ၂-ယောက် ဖြစ်တဲ့ Larry Page နဲ့ Sergey Bin တို့ရဲ့ project တစ်ခုက အစပြုခဲ့တဲ့ Google ဟာ အင်တာနက် အသုံးပြုသူတွေ အတွက် ဗဟုသုတရှာမှီးဖို့၊ ပညာရပ်တွေ စုဆောင်းဖို့ တံခါးပေါက် တစ်ခုပါ။ နေ့စဉ် အင်တာနက် သုံးတဲ့  အခါ တစ်နေ့ကို အကြောင်းအရာ တစ်ခုလောက်စီ ရှာဖွေ လေ့လာကြည့်မယ် ဆိုရင် တစ်လမှာ ကိုယ့် အတွက် အကြောင်းအရာ ၃၀၊ တစ်နှစ်မှာ အကြောင်းအရာ ၃၆၅-ခု ရရှိကြမှာပါ။ နေ့တိုင်း မလေ့လာဖြစ် ရင်တောင်မှ တစ်ပတ်ကို ၂-ရက်လောက်တော့ လေ့လာ စေချင်ပါတယ်။

ကိုယ်သိချင်တဲ့ အကြောင်းအရာ တော်တော်များများကို Google မှာ ရိုက်ထည့်လိုက်တာနဲ့ လေ့လာ စရာတွေ တပုံတစ်ပင် တွေ့ရှိနိုင်ကြမှာဖြစ်ပါတယ်။ သိချင်တဲ့ အကြောင်းအရာတစ်ခုခုကို How to နဲ့ အစပြုပြီး ရှာကြည့်လိုက်ပါ။ ဥပမာ- စက္ကူတွေနဲ့ ပုံစံမျိုးစုံခေါက်တဲ့ Origami ဆိုတဲ့ပညာရပ်တစ်ခု ဆိုပါတော့ How to make origami လို့ရိုက်ထည့်လိုက်တာနဲ့ စက္ကူကို အတိုင်းအတာ ဘယ်လောက် ဖြတ်ရမယ်၊ ကိုယ်လုပ်ချင်တဲ့ အမျိုးအစားအပေါ်မူတည်ပြီးတော့ အရေအတွက် ဘယ်လောက် လိုမယ်၊ တစ်ခုခြင်း ခေါက်ပြီးရင် ဘယ်လို ဆက်ရမယ် စတာတွေကို အသေးစိတ်ဖော်ပြပေးထားပါတယ်။ You tube မှာဆိုရင် ဗွီဒီယိုအနေနဲ့ပါ လေ့လာသင်ယူနိုင်ပါတယ်။

 နောက်ပြီးတော့ မိန်းကလေးတွေ လုပ်လေ့ရှိတဲ့ လက်သည်းအလှဆင်တာ ဆိုပါတော့၊ ဒါလည်း Google ထဲမှာ How to make nail art (သို့မဟုတ်) Nail art လို့ရိုက်ထည့်လိုက်တာနဲ့ လက်သည်းအလှဆင်တဲ့အခါ ဘယ်လိုစုတ်တံတွေ အသုံးပြုရမယ်၊ အောက်ခံ ကိုဘယ်လို ဆေးဆိုးရမယ် ကအစပြုပြီး၊ လိုချင်တဲ့ ပုံစံတစ်ခုခြင်းအတွက် ဘယ်လို ဆွဲရမယ်၊ ပြီးသွားတဲ့ အခါ အပေါ်က coding ကို ဘယ်လိုထပ်ရမယ်အထိ အစ/အဆုံး အသေးစိတ် လေ့လာနိုင် ပါတယ်။

ဒါတွေကို ပိုက်ဆံရှိရင် ဆိုင်မှာသွားလုပ်လို့ရတယ် လို့ ဆင်ခြေပေးမယ် ဆိုလည်း ပေးနိုင်ပါတယ်။ ဒါပေ မယ့် ကိုယ်ကိုယ်တိုင် သိထားရင် ဝန်ဆောင်ခနဲ့ ဝန်ဆောင်မှု၊ လက်ရာ ထိုက်တန်မှု ရှိ/မရှိ ကို ဆန်းစစ်နိုင် မှာဖြစ်ပါတယ်။ ထမင်းမချက်တတ်ဘဲ ထမင်းချက် ငှားထားရင် စေတနာကောင်းတဲ့သူနဲ့ တွေ့ရင်တော့ ဘာမှမဖြစ်ပေမယ့် ကိုယ့်ကို လူလည်ကျမယ့်သူနဲ့ တွေ့ရင်တော့ ခံရမှာ သေချာပါတယ်။

 လူငယ်တွေ ကိုယ်စီရဲ့လက်ထဲမှာ smart phone တွေ၊ ကွန်ပျူတာတွေ ကိုယ်စီ ရှိကြတယ်၊ ဒါပေမယ့် အများစုက တစ်ခုခု ဖြစ်ပြီဆိုတာနဲ့ ဘာဖြစ်လို ဖြစ်မှန်းမသိ၊ ဆိုင်ကို ပြေးကြရတာပါပဲ။ ကိုယ်လက်ထဲမှာ ရှိနေတဲ့ ပစ္စည်းတွေကို အခြေခံလောက်တော့ သိထားသင့်ပါတယ်။ ဒီသဘောတရားတွေကို စာအုပ် ဝယ်ဖတ်လို့ လည်း သိနိုင်ပါတယ်၊ ဒါပေမယ့် ကိုယ်က နေ့စဉ်နဲ့အမျှ အင်တာနက်သုံးနေတဲ့အချိန်မှာ တနေ့ကို နည်းနည်းခြင်းစီ လေ့လာထားမယ်ဆိုရင် ကျွဲကူးရေပါဆိုသလို အချိန်သက်သက်ပေးစရာမလိုပဲ တခါတည်း သိရှိနိုင်ကြပါလိမ့်မယ်။ ကွန်ပျူတာနဲ့ ပတ်သက်လို့ပဲဖြစ်ဖြစ်၊ ဖုန်းနဲ့ပတ်သက်လို့ပဲ ဖြစ်ဖြစ် ကိုယ်သိချင်တဲ့ အကြောင်းအရာတွေကို အခြေခံကစပြီး အားလုံး လေ့လာနိုင်ပါတယ်။

ဒါအပြင် ကိုယ်က နေရာဒေသတစ်ခုခုကို သွားတော့မယ်ဆိုရင် အဲဒီနေရာအကြောင်းကို ကြိုတင်လေ့လာ ထားနိုင်ပါတယ်။ အဲဒီနေရာဒေသရဲ့ ရာသီဥတုအနေအထား၊ ထင်ရှားတဲ့နေရာတွေ၊ အစားအသောက်၊ ဓလေ့စရိုက်စတာတွေကို ကြိုတင်လေ့လာထားမယ်ဆိုရင် အဲဒီကို ကိုယ်က တကယ်သွား ရောက်တဲ့အခါ အစစအရာရာ အဆင်ပြေပါလိမ့်မယ်။

 အခုဆိုရင် လုပ်ငန်းတော်တော်များများ မှာ Website တွေရှိနေကြ ပါပြီ၊ ကိုယ်က အလုပ်တစ်ခုကို လျှောက်တော့မယ်ဆိုရင်လည်း သက်ဆိုင်ရာ ကုမ္ပဏီ/ လုပ်ငန်းတွေရဲ့ website တွေမှာ လုပ်ငန်းရဲ့ ရည်ရွယ်ချက်၊ ဆောင်ပုဒ်၊ လုပ်ငန်းအမျိုးအစား၊ ဝန်ထမ်းဖွဲ့စည်းပုံ၊ လုပ်ငန်းရဲ့ တာဝန်ရှိ ပုဂ္ဂိုလ်တွေ အစရှိသဖြင့် ကြိုတင်လေ့လာထားမယ် ဆိုရင် တကယ် အလုပ်သွားလျှောက်တဲ့အခါ ဒါမှမဟုတ် အင်တာဗျူး ဖြေတဲ့အခါ ဒီအချက်အလက်တွေက က်ိုယ့်ကို ကောင်းကောင်း အကူအညီပေးနိုင် ပါတယ်။ ဒါပေမယ့် အင်တာနက်မှာ ရှာဖွေတဲ့အခါ အများစုက အင်္ဂလိပ်လို ရေးထားတဲ့အတွက် အင်္ဂလိပ်စာ အခြေခံ နည်းနည်းပါးပါးတော့ ရှိဖို့လိုပါတယ်။ အဲဒီအင်္ဂလိပ်စာ ကိုလည်း အင်တာနက်မှာပဲ အခြေခံကစပြီး တဆင့်ပြီးတဆင့် လေ့လာနိုင်တဲ့ နေရာတွေ အများကြီးပါ။

 အခုအချိန်မှာတော့ ကွန်ပျူတာ၊ ဖုန်း၊ အင်္ဂလိပ်စာ၊ စီးပွားရေး အစရှိတဲ့ သက်ဆိုင်ရာကဏ္ဍ အမျိုးမျိုးကို မြန်မာလိုပဲ ရေးသားဖော်ပြပေးနေကြတဲ့ နေ ရာတွေတော်တော်များနေပါပြီ၊ အရေးကြီးတာက ကိုယ်က အသုံးချဖို့၊ အချိန်ပေးဖို့ပဲ လိုပါတယ်။

အင်တာနက်ဆိုတာ တကယ်အသုံးချနိုင်ရင် တကယ်အဖိုးထိုက်တန်တဲ့ နေရာတစ်ခုပါ။ အဲဒီ ရတနာသိုက် တစ်ခုဟာ ကိုယ့်အနားမှာ ရောက်နေ/ ရှိနေပါလျှက်နဲ့ ဥစ္စာစောင့်များလို့ မစားရ/ မသုံးရတဲ့ အဖြစ်မျိုးတော့ မဖြစ်စေချင်ပါ။ ကိုယ့်အတွက် ဗဟုသုဖြစ်ဖြစ်၊ ပညာဖြစ်ဖြစ် နည်းနည်းခြင်းစီ စုဆောင်း သွားမယ်ဆိုရင် တစ်ချိန်ချိန်မှာ ကိုယ့်အတွက် အသုံးဝင်မယ့်၊ အကျိုးရှိမယ့် ဗဟုသုတ၊ ပညာရပ်တွေကို ပိုင်ဆိုင်နိုင်ကြမှာဖြစ် ပါတယ်။

“လူငယ်တွေ အင်တာနက်ကို အကျိုးရှိရှိ အသုံးချနိုင်ကြပါစေ …”

အောင်ကိုဦး (UMK)

TechSpace Journal